Que andas a facer?
No tocante ao ámbito das artes, o que mais me esperta
interese é a fotografía, polo que será o eixo central da miña proposta.
Que propoño?
A creación dun proxecto artístico fotográfico/ rede social de
fotografías de mulleres nun ámbito cotiá. Para isto, crearase un espazo web,
onde calquera muller interesada poderá subir as súas propias fotografías, cuxas
protagonistas sexan outras mulleres (ou elas mesmas) en contextos ordinarios,
desenvolvendo actividades do día a día. A través desta plataforma e das
diferentes aportacións, esta web tería unha estética similar a unha galería fotográfica
de exposición, onde calquera podería acceder para ver as fotografías que aquí
se publiquen.
As fotos que se subisen a este
espazo poderían ir acompañadas de descricións, comentarios… ou calquera aspecto
que a autora da mesma considerase interesante engadir. Tamén se habilitaría un
espazo para comentarios, onde debater e intercambiar impresións.
Por que o propoño?
Considero que é interesante crear
espazos onde sexamos as mulleres o obxecto da cámara pero tamén as que portemos
o obxectivo da mesma, así como poderen debater e comentar as diferentes aportacións
que se acheguen. O feito de poder acceder a un espazo de debate, fará posible reflexionar
sobre se existen coincidencias nas diferentes fotografías en tarefas que
desenvolven tipicamente as mulleres, como poderían ser os coidados. Unha
fotografía do cotiá, aporta información moito mais reveladora sobre unha
realidade, que aquela onde os suxeitos fotografados posen dun xeito consciente.
Este proxecto, non se trata só da
importancia de que as mulleres sexamos as protagonistas das obras artísticas,
pois isto leva sucedendo durante toda a historia da arte, sendo retratadas como musas. O mais
interesante, é que as mulleres sexan as propias creadoras desa arte (que tamén
hai moitas, pero invisibilizadas) para non seren debuxadas sempre dende unha
perspectiva masculina.
Por último, sería moi interesante
chegar a un nivel moi amplo de difusión, para poder acceder a fotografías que
reflictan as realidades diarias de mulleres de diferentes contextos culturais,
sen quedarnos só cunha perspectiva das mulleres occidentais.
Isto vai só dos coidados e o traballo no fogar?
Se falamos de actividades de
mulleres no seu día a día, moita xente automaticamente pensará no papel da
muller no ámbito doméstico ou desenvolvendo traballo vinculado aos coidados. É
lóxico pensalo, tdo@s sabemos que o ámbito doméstico non debería de ser dun
xénero exclusivamente, pero a realidade é moi diferente. Co cal, obviando os
supostos básicos de que o ideal sería a corresponsabilidade no fogar, este
espazo tamén pode empregarse para reivindicar os espazos propios das mulleres.
Os espazos públicos (así como os de poder), gozan dun mellor status social, en
gran parte porque sempre estiveron masculinizados. Sempre se promove que as
mulleres poidan introducirse en espazos masculinos, esquecendo por momentos
dotar do prestixio e status que merece o traballo doméstico e os coidados; que
se están tan infravalorados, é precisamente por ser tradicionalmente das
mulleres. Con todo, non se trata de
pensar que as mulleres no seu día a día só se desenvolvan no ámbito do fogar.
En definitiva, o único requisito
é que tanto fotógrafas, como fotografadas sexan mulleres desenvolvendo calquera
actividade diaria e corrente; xa sexan xeitos de divertirse, de traballar, de
descanso, de ocio... ou incluso para denunciar situacións.
Imaxes
:https://images.app.goo.gl/7jSRU25JSMRz5PyE6
https://images.app.goo.gl/UigqsGi6JLMn8YhM8
https://images.app.goo.gl/jN4NGX9euMfZqMVg8
https://images.app.goo.gl/aiJPnBr1EV8sANLy5
Comentarios
Publicar un comentario